Трэкавая велагоншчыца Таццяна Шаракова на дадзены момант ужо не галоўны прэтэндэнт на залатыя ўзнагароды і ў цэлым не настолькі папулярная медыя-асоба, як Аліна Талай. Аднак мае велізарны досвед выступленняў на буйных стартах, у тым ліку на Алімпіядзе. Талай 27 год, Шараковай 31-га ліпеня споўнілася 32 - для велагоншчыцы яшчэ цудоўны ўзрост.
На Алімпійскіх гульнях у Рыа-дэ-Жанэйра Таццяна Шаракова выступіць у омніюме - дысцыпліне велатрэку, якая ўключае ў сябе шэраг гонак, вынікі ў якіх падсумоўваюцца і вызначаюцца медалісты. Праграма шасці гонак стартуе ў 16:59 у панядзелак, 15-га жніўня са скрэтчу. А 22:30 па праграме гонка індывідуальнага пераследу, а 00:17 гонка на выбыванне.
Праграма омніюму працягнецца на наступны дзень, 16-га жніўня. Спачатку а 16:57 пройдзе круг з ходу, а 22:10 гіт з месца і, нарэшце, а 23:05 стартуе гонка па балах - апошняя, шостая дысцыпліна омніюму, пасля якой і будуць названыя чэмпіён і прызёры Алімпіяды.
Праз наш сайт многія аршанцы перадаюць гарачыя вітанні зямлячцы, да пажаданняў здароўя і перамогі далучаецца і рэдакцыя orsha.eu. Наперад, Беларусь!!! Наперад, Таццяна!!!
