10 траўня ў 17:20 супрацоўнікамі Аршанскага РУУС і міліцыянтамі патрульна-паставой службы Аршанскага АУСТ на тэрыторыі чыгуначнага вакзала былі затрыманыя двое грамадзян Народнай Рэспублікі Бангладэш, якія не мелі ўязных віз Рэспублікі Беларусь, паведамляе Група інфармацыі і грамадскіх сувязей УУС Віцебскага аблвыканкама. Двое мужчын 1978 і 1992 года нараджэння нелегальна заехалі ў нашу краіну транзітам праз Расейскую Федэрацыю. Па словах затрыманых, яны збіраліся наведаць Менск.
Нелегалы былі прыцягнуты да адміністрацыйнай адказнасці па частцы 1 артыкула 23.55 КаАП і дэпартаваныя за межы Рэспублікі Беларусь.
Нагадаем, што ў верасні 2018 года ў Оршы раскрылі злачынны канал перапраўкі нелегалаў з В'етнама ў Еўропу. А ў студзені 2019 на чыгуначным вакзале Оршы былі затрыманыя двое нелегальных мігрантаў з Пакістана.
