Віцебскі абласны суд 12 снежня вынес прысуд па справе аб забойстве ювеліра з Оршы. У злачынстве прызнаныя вінаватымі двое мужчын. Адзін з іх атрымаў 24 гады пазбаўлення волі, другі - 22 гады. У абодвух канфіскуюць маёмасць, паведаміла ў фэйсбуку афіцыйны прадстаўнік абласнога суда Наталля Платоненка.

Мужчын прызналі вінаватымі ў забойстве, спалучаным з разбоем, здзейсненым групай асобаў; у разбоі, учыненым групай асоб, з прычыненнем цяжкага цялеснага пашкоджання, з мэтай завалодання маёмасцю ў асабліва буйным памеры; у незаконным набыцці, перадачы ў валоданне, збыце, захоўванні, перавозцы, нашэнні агнястрэльнай зброі, боепрыпасаў, учыненых групай асоб па папярэдняй змове; у незаконным перамяшчэнні праз мяжу агнястрэльнай зброі, здзейсненым групай асобаў па папярэдняй змове.

Па прыгаворы суда адзін з мужчын атрымаў 22 гады, другі - 24 гады ў калоніі ўзмоцненага рэжыму. У абодвух канфіскуюць маёмасць. У кошт кампенсацыі маральнай шкоды з абвінавачаных спагналі 200 тысяч рублёў. Злачынства адбылося больш за год таму. Здабычай забойцаў сталі каштоўнасці на суму 50 тысяч даляраў.

Родныя забілі трывогу, калі мужчына перастаў адказваць на званкі. Праз некаторы час яго цела знайшлі ў лесе пад Оршай. Да пошуку забойцаў падключыліся расійскія праваахоўнікі: каштоўнасці і пісталет знайшлі ў Пскоўскай вобласці дома ў аднаго з двух падазраваных.