У пятніцу 4 мая 70-гадовы пенсіянер пайшоў у паліклініку здаць аналізы. Пасля наведвання доктара па просьбе жонкі ён зайшоў у краму каб купіць звычайных прышчэпак. Свайго тавару мужчына там не знайшоў і сабраўся ісці ў іншае месца. Але на выхадзе з крамы спёка і ўзрост зрабілі сваю справу - пенсіянеру стала кепска закружылася галава. Мужчына абапёрся на дом, каб пастаяць пакуль не пройдзе галавакружэнне. Але не паспела яму стаць лепш, як ззаду са словамі: "О, наш кліент - неадэкват" падыйшлі два міліцыянты, якія без тлумачэння прычынаў, не прадстаўляўшыся ўзялі яго пад рукі і кудысці павялі. Ад нечаканасці мужчына вырваўся, пачалася кароткая моўная перапалка ў выніку якой мужчына выказаў сваё абурэнне і паспрабаваў адыйсці ў бок. Але адзін з міліцыянтаў паставіў яму падножку. Пенсіянер упаў і страціў прытомнасць. Ачуняў ён ужо тады калі прыехаўшая хуткая дапамога зрабіла яму ўкол.

Мужчыну даставілі ў РАУС дзе склалі пратакол. Праўда, прачытаць пратакол мужчына не змог - не было акуляраў, а пазваніць жонцы, каб яна прывезла акуляры міліцыянты не далі. Да вечара затрыманы сядзеў у міліцыі, у яго ўзялі адбіткі пальцаў, сфатаграфавалі. І ў выніку пасадзілі ў ІВС дзе за цэлы дзень мужчына змог паесці - накармілі яго, дарэчы, суседзі па камеры, а не міліцыянты. Трое сутак пенсіянер правёў у ІВС так і не даведаўшыся за што яго затрымалі.

У панядзелак раніцай мужчыну даставілі ў суд адкуль адпусцілі - суд па яго справе так і не адбыўся.