Інцыдэнт адбыўся ўвечары 23-га красавіка, паведамілі ў прэс-службе МУС Беларусі. Каля 20-й гадзіны дзяжурная па станцыі Калодзішчы, што непадалёк ад Менску, заўважыла двух маладых людзей, якія знаходзіліся на хваставым вагоне таварнага цягніка Менск – Орша. Яна паведаміла пра гэта ў міліцыю. Састаў стаў тармазіць, і абодва саскочылі з яго. Але калі адзін з «зачэпераў» збег з месца, то другі паламаў сцягно і ладыжку, а таксама атрымаў рваную рану стапы і вялікую гематому. Траўмаванаму 19 год, міліцыя высвятляе, калі менавіта ён атрымаў траўму – трапіўшы пад цягнік альбо пры падзенні. На дадзены момант хлопец у бальніцы.
Другі аматар экстрыму мае 20 гадоў. Яго знайшлі пазней і склалі адміністратыўны пратакол за парушэнне правілаў карыстання чыгуначным транспартам. Абодва хлопцы – менчукі. Іх парушэнне пагражае штрафам да 3 базавых велічыняў.
