Аршанцы актыўна падпісваюцца супраць дзедаўшчыны ў беларускім войску. Збор подпісаў пачаўся яшчэ напярэдадні візіту лідэра Аб'яднанай грамадзянскай партыі Анатоля Лябедзькі ў наш горад. Прычым у размовах з жыхарамі і зборы подпісаў прыняў удзел і сам палітык. Збор подпісаў мае на мэце адстаўку міністра абароны Андрэя Раўкова і супрадзеянне дзедаўшчыне ў арміі. Новую хвалю размоваў пра дзедаўшчыну выклікала трагічнае здарэнне 3-га кастрычніка, калі на вайсковым палігоне Печы быў знойдзены мёртвым жаўнер тэрміновай службы Аляксандр Коржыч.
Пры гэтым Міністэрства абароны імкнулася спісаць усё на самагубства хлопца, аднак людзі запатрабавалі сапраўднага расследвання справы, і ў ёй сталі з'яўляцца факты, якія сведчаць на карысць версіі аб дзедаўшчыне, аб тым, што Коржыча альбо забілі, альбо прымусілі да суіцыду нестатутнымі паводзінамі. У першыя ж дні электронная петыцыя сабрала звыш 10 тысяч подпісаў беларускіх грамадзян, аднак затым была заблакаваная праз ціск уладаў. Тады актывісты распачалі збор подпісаў на паперы.
