Кампанія Federbet займаецца маніторынгам спартовых падзей і, у прыватнасці, дагаварнымі матчамі. Пад падазрэнне трапляюць звычайна гульні, у якіх па ходу матча назіраліся яўныя "паддаўкі" адной з каманд, альбо, напрыклад, іншая схема: на які-небудзь невідавочны, нават нечаканы альбо сенсацыйны вынік гульні за кароткі час паступае шмат ставак, а потым і гульня завяршаецца з "патрэбным" лікам. Здараецца і такое, што букмекерскія канторы спыняюць прыём ставак на нейкі матч ці нават здымаюць яго з лініі.
У справаздачу падазроных матчаў за 2015 год, гульняў, якія маглі быць дагаварнымі, трапілі 5 сустрэч першай лігі чэмпіянату Беларусі. Сярод іх і матч ФК "Орша", згуляны 12 ліпеня 2015 года ў гасцях супраць "Слоніма". Тая гульня скончылася буйной вікторыяй слонімцаў 3:0. Што менавіта выклікала падазрэнні ў спецыялістаў Federbet, не гаворыцца. Магчыма, розніца ў тры мячы, пры тым, што каманды на той момант знаходзіліся блізка ў турнірнай табліцы.
Акрамя таго, у спіс падазрэнняў трапілі яшчэ чатыры гульні:
"Зорка-БДУ" - "Крумкачы" (0:2, стаўка тотал больш 1,5), "Ліда" - "Кобрын" (7:2, тотал больш 2,5 і перамога "Ліды" з форай -1,5), "Іслач" - ГЧТ (2:1, перамога "Іслачы"), "Кобрын" - "Баранавічы" (2:2, перамога "Баранавічаў"). Неабходна адзначыць, што ў апошнім выпадку выніковы вынік матчу не супаў з прагназуемым.
Так ці іначай, двойчы ў справаздачы "засвяціўся" "Кобрын", а таксама трапіла на вока "Іслач", якая была задзейнічана ў дагаварняках у 2016, гэта было даказана, скончылася вялікім скандалам, і наступны сезон "Іслач" пачне з "мінусам" у графе "пункты".
