Пра затрыманне ўладальніка групы кампаній "Сервалюкс" і "Экамол Агра" Яўгена Баскіна стала вядома яшчэ 15 сакавіка. Часта падазраваныя па такіх справах праводзяць доўгі час нават пад следствам, аднак Баскін не правёў там і паўмесяцы. 22-га сакавіка ён выйшаў на волю і сам паведаміў аб гэтым журналістам. Разам з Баскіным былі затрыманы 15 пасадовых асоб кампаній, якімі валодае бізнэсоўца. Ім інкрымінавалі, як і Баскіну, ухіленне ад сплачвання падаткаў, прычым шкода дзяржаве, паводле словаў кіраўніка КДБ Вакульчыка, складала як мінімум 370 мільярдаў беларускіх рублёў.
Затым з'явілася інфармацыя, што Баскіна памясцілі пад хатні арышт "у сувяі з ізноў высветленымі абставінамі".
Фірма "Сервалюкс", якой валодае Баскін, у 2006 годзе купіла завод "Экамол" у Аршанскім раёне і ўклала ў яго 30 мільёнаў даляраў інвестыцыяў. Акрамя вытворчасці кармоў на аршанскім прадпрыемстве, Баскін таксама займаецца мясам птушкі, малаком, племянной птушка- і свінагадоўляй, гандлем сельскагаспадарчым абсталяваннем, раздробным гандлем - сетка "Квартал смаку".
