Кляштар перададзены праваслаўнай царкве, і ўжо з 2004 году, стаіць без даху. На першым паверху ў некаторых месцах з’явілася тынкоўка – але ў чым сэнс такой рэстаўрацыі не зусім зразумела – магчыма замазваюць самыя пашкоджаныя месцы.
Базыльянскі кляштар ў Воршы унікальны помнік архітэктуры. На сённяшні дзень ён перададзены Праваслаўнай царкве, каля яго пабудаваная драўляная праваслаўная капліца з характэрнай “цыбулінай”. У 1758-74 гадах храм быў узведзены ў цэнтры Воршы на правым беразе ракі Аршыцы ў стылі Віленскае барока. Першапачаткова гэта была ўніяцкая царква Апекі Маткі Боскай. Побач знаходзіліся жылыя корпусы кляштара базыльянаў.
На фота: Базыльянскія муры, кастрычнік 2015
Пасля адмены Уніі і храм, і кляштар былі перададзеныя праваслаўным – там размясціўся праваслаўны мужчынскі Пакроўскі манастыр і духоўнае вучылішча. Царква стала называцца Свята-Пакроўскай.
Саракаметровы будынак храма ўзарвалі напрыканцы 60-ых гадоў. Аршанцы памятаюць, як гэта было, і сцвярджаюць, што нават у выглядзе руінаў царква выглядала велічна і пакідала моцнае ўражанне. Знос царквы шырока абмяркоўваўся ў Воршы напрыканцы 60-ых – нават у Льнокамбінацкім радзільным доме - піша "Радыё Рацыя".
