30-га лістапада быў затрыманы блогер Дзмітрый Казлоў "Шэры Кот". У гэты дзень блогер з'явіўся ў міліцыю па позве і быў затрыманы. Гэта ўжо не першы выпадак, калі міліцыя паступае падобным чынам. Верагодна, справа супраць Казлова заведзеная па прычыне сустрэчы ў Мінску, дзе блогеры на плошчы Свабоды ўбачыліся з людзьмі. Фармальна гэта было сустрэчай выбаршчыкаў з кандыдатамі ў дэпутаты. Сам жа Казлоў за некалькі дзён да галасавання быў зняты з выбараў за лёзунг супраць лукашэнкаўскай улады.
З раніцы 2-га снежня прадстаўнікі грамадскасці прыйшлі ў суд Оршы і Аршанскага раёна. Аднак доўгае чаканне судовага працэсу па адміністрацыйнай справе не скончыўся нічым. Паперу з нумарам кабінета і прозвішчам суддзі нават не вывесілі на адпаведнай дошцы. І толькі пазней высветлілася, што адміністрацыйны працэс над відэаблогерам Дзмітрыем Казловым пройдзе не ў судзе, а ў РАУС Аршанскага раёна. Адрас: вуліца Энгельса, 25. Наш сайт праінфармуе чытачоў аб ходзе падзей.
Па стане на 12-40 суддзя абвесціў перапынак. Больш за 10 чалавек прыйшлі падтрымаць Змітра і зараз знаходзяцца ў міліцыі ў чаканні працягу працэсу.
