Доўгі час на мяжы двух раёнаў Віцебскай вобласці — Талачынскага і Аршанскага не было ўказальніка на раку Адроў. Атрымалася даволі сімвалічна, што два актывісты, якія жывуць у гэтых раёнах, звярнуліся да ўладаў з просьбай знак усталяваць. Ігар Грышанаў жыве ў Аршанскім, а Мікалай Петрушэнка ў Талачынскім раёне. Спачатку на іх зварот прыйшоў адказ, што знак на месцы, аднак на месцы высветлілася, што гэта падман — ніхто дарожны знак аб аб'екце не ўсталяваў. І толькі тэлефанаванне на прамую лінію да чыноўнікаў вырашыла праблему. Цяпер кожны, хто праязджае на транспартным сродку паўз гэтае месца можа зразумець, дзе менавіта знаходзіцца. А заадно вывучае геаграфію мясцовасці.
Рэкі Крывая, Сакалянка і Адроў былі свайго часу ўключаныя ў знакаміты шлях "з варагаў у грэкі". Цяпер у планах спадароў Грышанава і Петрушэнкі ўсталяваць каля вёскі Задроўе па плыні Адрова масагабарытную мадэль ванчоса. Гэта расколаты 6-метровы брус з дуба, які ў свой час сплаўляўся па рацэ і з якога потым рабілі палі і бэлькі сабораў і замкаў Еўропы.
